愛書堂

莫嫌舊學偏新學

心遠廬

不薄今人愛古人

主頁

           廖恩燾新粵謳解心   頁:  1..   2..

廖恩燾影樹亭詞   更多廖恩燾作品     民初粵謳南音龍舟    粵韻絃歌    藝海光華   星影浮沉    經典名曲120     歌影東瀛     歌壇憶舊    好歌百回聽  經典歐美流行曲   經典歐美電影 一覧


楊花

條命咁薄。又試咁飄零。况且春老正話飄零。身世重更輕。你睇萬樣花飛。都唔係咁冇影。春光唔留得佢住。幾咁無情 。你妹若係似得佢楊花。咁冇定性。風嚟吹吓。容乜易就吹清。好在情絲牽掛吹極到還定。得到情絲吹斷。就化作浮萍。化到了浮萍。就怕君呀你都難認 。萍水相逢。邊箇叫我做卿卿。我想妹既係浮萍。君你亦係斷梗。浮萍與及斷梗。根蔃本係同生。同是天涯淪落。君呀。你就要憐同病。點解同病相憐。又試背了舊盟 。今日你當妹係水性楊花。我惟有怨命。大抵敗柳變作殘花。亦份所當應。唉。就算我係殘花。君你亦唔好學佢斷梗。斷梗至係無根。問君你知到未曾。

牡丹花

牡丹呀。你咁富貴。乜我又共你無緣。漫講瘦菊寒梅。艷福讓你享先。就係嬌杏夭桃。都差得好遠。捰a海棠花婢。點配共係爭妍 。味估蘭就稱王。氣候重淺。點似你紅雲萬朵。擁住神仙。呢陣你在洛陽。都算紅到出面。紅成咁樣子。問你發乜花顛。累到佢地蜂忙。唔止話蝶亂。都因為你容顏壓倒。佢粉黛三千 。只恨無賴東風。唔吹到你箇便。枉你有香都難送。到翡翠簾前。你千日望人地護花。都唔係上算。試睇落紅滿地。有邊箇哀憐。櫻花野性。桭N終唔轉。虞美人咁好。亦會侵入你百寶欄邊 。萬一佢牛牡丹還重作賤 。唉。唔使咁艶羨。至怕錦綉山河變。牡丹芽咁嫩。勸你小心行幾步。咪錯踏金蓮。

如果你話要去

如果你話要去。你妹唔恨你快番嚟。索性耐的番嚟。免使又試去過咁慘悽。我自係落到河底下正知 。情字咁累世。往日未試過別離苦楚。點會白把眼淚嚟徙。睇見人地送行流淚。我重會嚟開解。呢吓到我共郎分別。自己就開解唔嚟。捨得係學做女箇陣情竇未開 。亦唔怕同你割愛。呢陣割亦難分。我自怨一句獃。情癡顛倒。咪話身唔壞。你 睇我地近來瘦到。都似好條柴。君呀。你出路唔比得在家。冇人替你安慰。萬樣都要放吓寬心。切莫介懷。我亦想把你暫且丟離。唔掛繫。點估日低唔掛。夜堣S試夢見你番歸 。我日夜想爛心肝。都係望郎你帶。唉。郎你帶。咁就唔枉你妹一年到晚。食盡咁多齋。

咪估話同你咁好

報載美國加拉佛尼省土洛埠驅逐日僑,美政府事後懲兇,日人頗為滿意。因憶上年洛斯勃冷槐花園各案,焚殺華華僑千數百人,交涉經年,僅以賠償了結 。由今視昔,不禁慨乎言之。

咪估話同你咁好。就當佢係真心。情實佢兵行譎計。幾咁陰沉。一自共你相交。一自就嚟將你噤。噤到你死心嚟向佢 。就等你去大海撈針。你睇佢近日點樣子待人。就知到佢平日點解待成你咁。將人比己。問你點得心甘。當日妹你咁為難。佢氣都唔替你爭得啖。呢陣替人地爭起氣番嚟。乜又咁易得斟 。思前想後。點叫你話心唔淡。捨得你唔係信晒佢時文。亦唔會累到咁深。我想你躀倒望人地嚟拖。邊有咁錯。除非自己腳踭行穩吓。味跌落萬丈深潭 。千箇聽人地手指鏬開埋。都幾係咁慘。咪估做一天和尚。就有一日巫喃。捱過了呢一陣風波。或者唔使靠人地做膽。水漲船高。重會有風色著啱。唉。在乜撑船就。但得妹呀 。你纜長灘都拉上去。怕乜唔到七星巖。

嬌呀你唔好去自

嬌呀。你唔好去自。係去都要對我講句時文。咪話半句唔聲。一步就奔。索性先帳去左咪番嚟。我亦唔使恨。點解番黎又試去過。咁冇麻紋。惱過就正好番。應該就唔會折散。點估凳都未曾坐熱。話扯又話到咁多勻。大眾相與咁情長。點捨得丟你嚟另揾。就係週時擙吓頸。冇耐又試嚟温。呢陣半站中途。誓願都要㨢埋你一份。若話靜靜行開。邊箇做你替身。竹織鴨咁有心肝。怕唔梆得佢穩。有的交情靠得住。又唔肯共我埋羣。千日都為錢債打叠唔通。故此你成晚咁腎。重怕惡佬起沙尋趁。正係攞命災瘟。無論點樣子為難。你都要頂架埋你陣。免使受旁人指摘。作賤三分。萬帶有我當頭。你亦唔使肉緊。日後總有箇商量結局。在乜嚬㖮。唉。好頭不如好尾啦笨。容乜易等到酒闌席散。咁就一齊拖拉住手。正話行人。

怕乜同佢直接講句

怕乜同佢直接講句。若果係話真情。至怕冇半句真情。就會上佢一遍當添。平日當妹係人。就唔會話咁樣攞景。監埋廿一件。都要你應承。見佬見盡咁多。唔曾見過咁嘅品性。妹唔係冰糖。點解一啖就想椏M。呢陣知到爭氣有人。唔輪到佢使頸。正話想忿吓低頭。共妹細傾。妹你索性一味唔兜。推到佢干淨。等到百眾眼頭箇陣。點怕講佢唔贏。道理擺出就係架天秤。輕重都憑大眾去戥。邊頭輕重。總要戥到分明。唉。咪話唔使戥。若係架天秤公道吓。妹呀。你不但唔慌食抵。重會十足收成。

佢又試嚟呃過你

佢又試嚟呃過你。妹呀。乜你重係咁樣子刁難。佢搶你件野收埋。不溜都話俾番。捨得係話當面問佢攞得番。使乜同晥樾瞗C但係佢口甜舌滑。你摸唔中佢心肝。臨時反骨。你妹見盡千千萬。况且貪頭咁大。點共佢講得埋欄。你睇往日箇皮條。就係咁樣撞板。幫佢掘成箇氹。丟妹落中間。呢陣削性一句推清。唔聽佢再躀。免使話妹串同夾計。咁受人彈。事幹擺白出嚟。睇吓佢地朋友點辦。或者由天分付。打得過呢箇通關。至怕朋友亦話事唔嚟。一拍仍舊兩散。唉。船駛到上灘。試問妹呀。前途重有咁遠。你點樣把舵嚟𢶯。

 

本站旨在弘揚和傳承源遠流長之中國文化,網頁內容或有轉鈔各名家著論。如有謬誤及冒犯著作權益,請即指正 ,自當修改刪除。