梁上燕 梁上燕。你咁高飛。咪箇飛到高時。又試跌落嚟。華堂閥閱。正係唔堪恃。咪估金張門第。就算有了挨依。你亦知寄人簷下。必定飛唔起。夕陽門巷。乜又錯認烏衣。虧你在簾前絮語 。係咁呢喃細。大眾商量。重想各借一枝。人地彈丸在手。都話嚟彈你。大厦垂危。問你一木點支。雖則話毛羽未豐。都重係儌倖事。只怕生齊毛翼。就要把舊巢離 。唉。知到未。你密密係咁銜花。亦算辛苦過世。終須有日得到梁空。就會落燕泥。 情一個字 情一箇字。乜咁收人。若係怕話收人。至好就咪共佢温。温到入心。情就越緊。自綁春蠶。點得甩身。咪估話共佢別離。緣就冇份。點知到別離箇陣。重慘過刀割咁難分 。別後情思。又試要從夢裏去揾。揾着箇夢裏夢山。叫我怎不斷魂。况且夢裏相逢。不過傾箇一陣。一陣時間。講得幾多句時文 。捨得佢講出有半句真情。亦都消吓啖怨恨。只怕佢夢中仍舊。冇半句情真。醒後傷心。重防到人地問。唉。亦唔敢講過人聽咁笨。怕佢地口疎傳出去 。失禮同羣。 大葵扇 大葵扇。一潑就癡埋。扇呀。你潑得我地癡埋。咪箇又試潑開。你妹流落在呢處煙花。唔係幾耐。銷魂兩箇字。未知道點樣由來。睇見人地孖佬嚟温。我亦都唔志在 。用盡幾多橋段。正話把佬嚟推。晚晚雖則係酒綠燈紅。你妹唔睇得在眼內。既然叫到，亦都要勉强嚟陪。河底下叫得做話因緣。我想多半係露水 。唔係前生注定。點得共佢埋堆。就算揀着箇 知心。好似話同妹登對。兩家情願。使乜月老為媒。但係我未試準佢心腸。又怕日久脾性會改。况且揀着箇有心無力。枉費佢一表人才。千日唔帶妹上街 。千日都仍舊係累。唉。仍舊係累。重怕丟妹在九霄雲外。箇陣息晒心頭點火。你就扇都潑佢唔回。 泥菩薩 泥菩薩。任水漂流。你顧得自己嚟。點重替得弟子擔憂。大早當你係位靈神。想話靠你嚟保佑。故此叢林裏面。起到咁大座廟過你嚟踎(原上茂下足)。見你相貌幾咁非凡 。身裁又咁大嚿(原左肉右多)。估你驅邪擋殺 。是必有的良謀。點估受盡香煙。火氣重唔曾得夠。講乜慈雲法力。會把妖收。貓屎疴滿神台。你都唔聞見臭。係咪認真盲鼻。抑或有別樣緣由。冷落山門。枉費話有金剛守 。虧你畫符念咒。使唔郁箇班牛。况且財帛星君。唔肯幫你手。問你點金無術。邊處去揾香油。唉。咪咁吽哣。菩薩係泥。你話還有乜救 。就算背後有箇扯起線番嚟。你亦不過會叭頭。 春花秋月 凡四 之 春 春呀。你唔好去自。聽我講一句都未遲。共你有三箇月交情。亦該講過你知。斬吓眼就春事闌珊。你話容乜易。但係你春光重咁明媚。點捨得共你分離。人地話枯木逢春。都會有青綠意。點解你年年嚟到。我就一自自減少丰姿。况且你青春辜負我郎年紀。朱顏漸改。兩鬢成絲。我郎別後嬾寄相思字。終日春山顰黛。蹙斷蛾眉。萋萋芳草斜陽裏。不見王孫歸路。我靜掩金扉。玉樓人醉。繫馬垂楊地。不是我郎來到。誤聽紫騮嘶。虧我好似天涯燕子。想話隨春去。去到杏林箇處。共佢雙飛。千日都係你春色撩人。惹起我傷春嘅心事。咁我就恨錯留春。累得咁癡。今日惜春詞寫千張紙。唉。空聽流鶯語。試睇畫橋春栁。都為着年年送別。瘦損腰圍。 春花秋月 凡四 之 花 花呀。你唔好謝自。聽我訴一句過東風。話佢東風無賴。咁虐待我地殘紅。大抵薄命如花。正係千古痛。飄零金粉。各散西東。你話幾耐正釀得花開。天唔係懵懂。一年花時。盡在雨聲中 。總係開箇陣繁華。就要開得耐至有用。乜解開齊有耐。又試落得咁匆匆。箇朵若係鏡裏曇花。我就當佢春婆一夢。夢中人影。就係鏡裏花容。但係佢委實你係朵鮮花。就怕着浪蝶狂蜂嚟舞弄 。點得有箇憐香摘佢番去。護在熏籠。雖則話摘哩。就要趁佢花開情正重。等到無花嚟摘。佢就埋恨芳叢。講到傾國名花。斷冇話塵世種。是必瑤台月下。正會相逢。唉借重 。好極花香。亦要風嚟送。但得佢東風同我着力。就免使學沾泥弱絮。在水面飄蓬。 春花秋月 凡四 之 秋 秋呀。你唔好老自。聽我鬧一句風雨無情。做乜就到重陽。又試草木皆兵。我想當初一葉梧桐。墜落金井。暮蟬三五。重在樹上嚟鳴。雖係話窗外唧唧蛩吟。蓮漏都咁靜。但係遼天鶴唳。幾咁凄清。我閒步空階。隔牆送過鞦韆影。呢雙羅襪。濕透冷露無聲。翠袖寒侵。怕惹起相思病。歸去把珠簾放下。只見幾點疎星。可惜好夢將成。又着霜鐘敲醒。咁就孤燈如豆。坐到天明。好容易有隻鴻鴈南來。問佢音書又冇應。樓頭飛去。直入蓼花汀。虧我觸景懷人。獨自闌干凭。望斷茫茫烟水。淚眼盈盈。君呀。你荻花瑟瑟。切莫琵琶聽。怕你學佢江州司馬。遇著箇紅粉飄零。你若話秋以為期。奴就先去掃徑。東籬松菊。日日盻你歸程。唉。須記省。人瘦比黃花。容貌亦易認。千祈咪當妹係明日黃花。好似秋後扇咁㩞。
春花秋月
凡四 之
月 杜鵑啼 愁人耳。怕聽杜鵑啼。雀呀。人地有人地在天涯。使乜你叫佢去歸。捨得佢叫起首就可以番歸。亦唔使你掛繫。盡在佢想歸唔得。白白惹起愁懷。你睇關河千里，煙塵咁大。暮雲遮斷。點重有故園棲。唉。你名叫做望帝。想你血淚啼紅。總係傷心家國敗。乜你又唔飛去。我地故園箇處。叫醒吓癡迷。若係叫得醒癡迷。我就唔將你怪。唔將你怪。箇陣青山紅樹。就一鞭殘照。欵段歸來。 花本冇恨 花本冇恨。點奈得情何。情字重起番嚟。就會到恨字收科。人地話花咁有情，妹你做花就唔係乜錯。至怕做著朵薄命桃花 。咁就恨更多。就算做著朵牡丹。富貴嚊容乜易過。學到蓮花咁清淨。亦要好耐正出得泥渦。究不若妹你係野花。摘到番歸還重妥。免使在百花叢裏。受盡消磨。平日當妹係頭上箇朵素馨温哩亦都温到够咯 。點估温完冇耐。就共妹丟疎。千日唔到落葉歸根。千日都無乜結果。重怕狂風吹吓。又試吹妹落河。箇陣你再流落在煙花。仍舊涴浽 。人來客往。邊箇係你情哥。講到世事番嚟。大眾都係揞埋雙眼咁摸。摸著箇多情。又怕佢唔得穩陣。枉費奔波。恨海茫茫。妹你唔好再墮。情天有位佛 。勸你念句彌陀。或者佢大發慈悲。憐憫妹咁苦楚。你就問韋陀借佢把劍。斬却情魔。呢回唔受花粉難囉。養埋三兩箇女。做吓事頭婆。唉。唔論邊一箇 。斬得斷情根。就唔使種禍。唔信你睇往日至好收場。重算係肥水艇亞娥。 人要會做 人要會做。咪做著箇薄倖王魁。你若果做到薄倖王魁。你妹就唔恨箇出戲開台。我想人客有幾多箇真心。情實係碰彩。有箇真心人客。就算係前世修來。講極真心。都唔得幾耐。一到有人疎攪。又試分開。不若當初見你面箇陣時。索性唔啋。兩情唔動。點得埋堆。至弊你我都係當日動起情緣。唔捨得割愛。累到呢陣掛腸掛肚。我自怨癡呆。你就係唔問良心。亦都唔好將妹咁害。做人做到咁樣子。你 睇天上行雷。唉。霎氣袋。你有人就唔要妹。除非等你換過副五臟番嚟。我正敢去請月佬為媒。 無了賴 無了賴。墮落青樓。有邊箇人客開嚟。替我分得吓憂。唔係打開箇揀𥺁。我重唔曾知到咁瘦。唔係單思成病。你話為乜緣由。又唔關事一日三餐。唔好燉脰。點解瘦到條籐咁樣。大肉唔收。想必係枱腳太多。成晚咁走。捱更抵夜。唱破嚨喉。天光正話埋床。起身就係晏晝。有人嚟叫。正話梳頭。重咁拚命猜枚。飲埋的寡酒。好在臙脂搽起。塊面冇咁黄拋。漫講喫飯近來。唔好胃口。就係米粉都食半椀唔埋。重落到成碟豉油。河底下雖則話繁華。呢的難就夠受。况且生意唔係週時咁旺。世界會有輪流。靚極似朵鮮花。人地都話敗柳。电埋幾伙熟客。就衰過偷貓。廿一二重未上街。人客就當老藕。想到世情咁淡。我就萬念俱休。唉。想到透。前世唔知做過乜野陰功。到今世報仇。 心 心只一箇。點俾得咁多人。箇箇叫我番嚟。都想話咁認真。捨得我有幾箇心肝。一人俾箇。亦無乜要緊。無奈我只得呢条心事。你話夠幾多個人分。至好我心劏得開幾邊。一人分佢一份。箇陣大眾都話係得心人客。咁就冇半句時文。但係心斷無話劏得開。叫佢地唔使恨。邊一個死心嚟向我。我就許落佢終身。我想世界上人客死心。唔係咁容易揾。揾着箇死心人客。怕乜拚命嚟温。大抵人客死心。重要你妹条命穩陣。唉。至怕唔得穩陣。試睇吓賈寶玉死心成咁樣子。就剋死箇晴雯。 咪話唔信命 咪話唔信命。又咪信得佢咁靈檠。好醜就算係命裏招嚟。亦咪把人事放輕。有陣人事亦會勝天。唔在話命生得正。世界事總係半由人做。一半係條命生成。若果話富貴窮通。都係整定。唔通你就一便心嚟等。跌落粒天星。若果話命咁無憑。你又一味同佢鬭硬。只怕命宮磨蝎。點到你嚟爭。大抵人事盡到十分。總有好幾分會應。箇陣正話聽天由命。睇吓造物點樣權衡。但係我話人事盡到十分。唔係話同天擙頸。萬事總憑箇理。咪箇橫行。講到陰騭番嚟。實在唔使算命。我有本事醫番条命。咁佢算命就唔靈。唉。將人做鏡。你照見人地做人點樣子。自己就有的章程。 開場白 解心啫，有乜新鮮，做乜又叫起新粵謳嚟，睇落唔值半個爛私錢。我想心事咁惡解開。唔到你解一千遍，千遍都解佢唔開，心事咁堅。但係千遍終須會有一遍解得開，條心就軟。解到條心軟咯，重快活過神仙。你睇銘山(招子庸)當日，撥起琵琶線，對住珠江明月，唱到奈何天。春風一曲，教會多少雛鶯同乳燕。無限離愁別限，訴向四條絃，彈出句句真情，兩行紅粉都要憑眼淚洗面。 點止個青衫司馬，醉到在孩前。自古風月繁華，邊個唔話艷羨。至好借佢多情風月，超拔你地苦海無邊。咪話舞榭歌台，祇作閒中消吓遣。但得佢心中無妓，亦使乜當你係過眼雲烟。且學個位生公說法。咁把身來現。唉!身來現，講到慈航普渡，重要去揾如來佛祖，問個段因緣。 咪話唔信鏡 咪話唔信鏡。鏡咁光明。鏡係光明。故此照得咁清。水月鏡花。唔算係幻境。借嚟照吓。就照得出真形。後生箇陣。照見鮮花靚。等到老嚟正照 。就無咁靈檠。老起番嚟。唔瞞得過面鏡。額頭打褶。點到你唔驚。人地話鏡至偏心。或者係都唔定。點解照人咁靚。照我地咁無憑。既係佢咁無憑 。我就唔怕佢抗。唔曾忿老。怕乜共佢嚟爭。爭到驘時。我就唔再信鏡。老有雄心。重好過後生。勸你地愁極都咪對住鏡嚟。温咁怨命。吊影唔該。學佢小青。唉。重還吊乜影。鏡裏煙塵。掃唔得乾淨。好在天上一輪月鏡。都重係咁照住行人。 賣花聲 花哩。一聲咁就叫到埋嚟。托住籃花。轉過對街。你睇鷹爪白蘭。香到翳膩。素馨含笑。穿定一排排。鮮花咁靚。邊箇唔思戴。點解佢在深巷叫了成朝。重未賣埋。過吓花就漸漸將殘 。香氣亦壞。送人都唔要。白白咁就嚟嘥。何况我地陌柳牆花。正係隨街擺。三年兩載。算係禁擠。新鮮箇陣。睇見人人愛。得到花殘 。就賤過泥。就算有箇唔捨得咁好香花。買嚟戴上髻。温完温罷。又試丟低。想到歸根。我亦唔恨佢買。究不若襯吓箇花藍 。贃得自己威。野花雖係話唔矜貴。顏色鮮明。怕乜摘朵嚟伴髻圍。唉。趁早還花債。免使逢人叫賣。做呢的花粉生涯。 你咁為命 你咁為命。著乜來由。兩箇都係咁樣鍾情。我實在替你擔憂 。就算佢係糖。你又唔係豆。點解一見就癡埋。容乜易把命收。人地話風流重要有命嚟消受。你咪箇命都唔顧。淨顧風流。雖係話乾柴凭火。你捱唔久。至怕佢係燈心。你係箇盞油。一自自油就點乾。情亦知到係吽。但 睇牛唔飲水。你話點㩒得低隻牛頭。恩愛到十分。都要留番的後。後來恩愛。正算係鳳侶鸞儔。故此花好月圓。亦要人長壽。命短許你係情長。點講得終老温柔。唉。但得條命就。冇話鴛鴦唔白首。若果似得晴雯咁短命。怕乜你會補箇件翠雲裘。 無乜好怨 無乜好怨。只怨我為情牽。捨得我學人地咁薄情。點會共你癡纏。蠶絲自綁。因為絲唔斷。縱有利刀難割。佢綁到成團。我既係自作多情。又偏遇著郎你咁薄倖。待人唔同待我。乜咁心偏。我萬樣都可以睇開。單係情字唔過得線。你見我近來待你啲心事。係咪重似從前。你口口聲聲。都話唔虧負我呢遍。咁就何妨誓一句願。對住當天。等我好心忒起心肝。靠埋你一便。免使大海茫茫。撑住隻冇舵船。天呀。你生得我咁多情。乜又俾我條命咁賤。若果我多情唔係命賤。重安樂過神仙。但係世事亦唔會刋板話得定。有啲千金小姐。都要拆散因緣。唉。唔在幾遠。試 睇吓紅樓夢箇林黛玉姑娘。就夠你可憐。 錢 你眼孔咁窄。都見盡世態人情。唔知到你力可通神。一向把你睇輕。雖係共我緣份未深。週時蒙你照應。記得箇帳困在窮城。得你做救兵 。有陣急到燃眉。你又偏要攞景。枉你鑿明係通寶。都不過浪得虛名。萬事非你唔成。乜得咁抗。冇你就會畫符念咒。都使鬼唔靈。遇著箇慳哥。佢就要你唔要命。但係濶佬又當你係泥沙 。到手就劈清。近日你勢力漸差。唔惡得過番鬼餅。况且紙都當金嚟使。重講乜時興。鑄到銅仙。點叫你唔減頸。十箇都換一箇唔嚟。我亦替你不平 。大抵世界一話轉流。貴極都無難變賤。斷唔咕幾千年國寶。呢陣市面亦不通行。唉。整定。除非在攤皮上。正話能見你面。真正令你十分難過咯。孔方兄。 還花債 花債咁重。花呀。你未曾知。得你花債還通。正話有了期。想到花有了期。我就情願花債唔還自。暫且留你在花叢。免使共你割離。鮮花開透。正係唔禁睇。至好花含曉露。不溜都係半開時。花若開透番嚟。冇耐就落地。落花唔會再上空枝。故此花債唔還。我亦隨在你。咪箇又試花飛。等到債要還時。你話容乜易。總要花間姊妹。肯話維持。得佢地肯話維持。花債亦唔怕再借。唉。就怕冇人肯借。咁就要借到東風無賴。任佢錯折你薔薇。 同心草 同心草。莫問點嚟生。草亦結得同心。咪話草木冇情。捨得人心似草。亦有欺霜性。受盡咁多寒冷。都重係色青青。點會心似散沙。隨地咁捲。漫講同心冇結。就係團體亦結唔成。重怕你草漸蔓延。鋪到滿徑。偶然打草。就著蛇驚。草呀。你果係想結同心。就要心先正。咁我又怕乜學佢地葵心。向日咁傾。但係你對住同根。唔肯話苔岑訂。有的唔同種類。你偏去結同盟。佢生長在西方。你就當係靈芝認。枉你在淺水蓬萊。照影咁清。著佢馬蹄踏碎。你都重唔知賤。野煙迷斷。唔睇見我地漢家營。勸你及早回頭。唔在等風吹醒。前途雖遠。重有咁好夕陽明。唉。晚景。咪話心唔定。就怕燒起箇座山嚟。不過係一粒火星。 洋遮 唔係落雨。妹呀。乜重唔把遮收。定係開起把遮嚟。遮吓熱頭。人地話落雨擔遮唔顧後。妹呀。你後來唔顧。就會有眼前憂。怕佢路上爛仔嚟撩 。撩到你醜。呢把洋遮咁細。亦可以遮羞。若果佢重係騾皮。嚟講爛口。你呢条遮柄。斷冇情留。呢陣男女平權。你地唔會有氣受。咪估佢地係男人。就蝦得你地女流 。遮柄一条。揸在你手。况且掛起番鬼招牌。專係泡製佢地班牛。唉。牛亦唔會咁吽哣。激到你要借老番嚟恐嚇 。佢就應該想起吓因由。 酒咁有味 酒咁有味。味話濁酒唔清。飲上三幾杯嚟。面色就帶住晚霞明。酒呀。記得我把盞談心。情咁綣戀。點解在離筵餞別。你又試咁無情。捨得酒真正係合歡。唔會亂性。怕乜週時放量 。飲晒成埕。但係酒醉唔知。酒嘅弊病。闖出彌天大禍。都因為醉漢橫行。人地話酒可銷愁。唔怕愁眉不展。借你酒兵嚟破 。箇座愁城。醉鄉深入。就係神仙境。把箇紅塵世界。睇到十分輕。我醒眼睇見佢地醉人。醉到酩酊。索性自己都醉埋一份。免使醉得咁零丁。至怕醉到昏迷。未知何日醒。得到醒時知錯。就誤了平生。若果話醉過番嚟。醒得更定。咁我就請君入甕。睇你有乜章程。我地好酒家藏。無奈量淺。監住送人嚟飲。飲到好似長鯨。重話酒逢知己。半滴都唔剩。試問佢一杯領落晒。多謝過你唔曾。 百花生日 花都做起生日。必定想壽與天同。捨得花國係話長春。怕乜學佢三祝華封。但係人到了花甲一週。纔話介眉上頌。壽桃食過。正做得壽星公。你鮮花咁嫩。拜壽亦唔中用。使乜去請諸天神佛。保佑你如柏如松。人地話你九十韶光。情實係詐懵。你今年屈指。不過廿四番風。花鬚咁短。冇得過佢游蜂弄。就算叫得做老來嬌。亦不過係百日紅。你芝蘭玉樹。正話階前種。海棠未嫁。邊個對你稱翁。况且歲歲都有箇花朝。何必咁鄭重。壽屏壽幛。掛滿蕊珠宮。鶯朋燕友。壽禮紛紛送。收不盡堆黃積白。幾咁情濃。大抵世界繁華。原係你地作俑。試睇荷葉擎珠。點夠一浪就空。問你錦上添花。人咁眾。送炭何嘗肯在雪中。雖則係滿地楡錢。近來咁鬆動。既然唔駛得晒。何不賑濟吓貧窮。呢的無謂花銷。慳得就唔着咁放縱。累到成身花債。都因為好嚟充。唉。肉痛。你地係話人人省吓的花費。就緩急都可以通融。 桃花 乜得佢咁靚。笑靨帶住微渦。脂粉搽嚟。都算係淡掃雙蛾。人地話佢艷質如仙。真正冇錯。你睇武陵春色,醉到顏酡。至好係竹外橫斜。開透幾朵。若話種佢在欄干。有的挨凭。就會著月影桃疎。你既話愛寫花容。削性就寫到佢妥。免使風吹雲掩。把佢花月一樣咁消磨。大抵命薄至到桃花。怕冇再薄得過。點估我条爛命。重薄過佢好多多。佢命薄得到花殘。還有結果。我後來結果。點知到如何。想話揾着箇世外桃源。嚟避吓禍。又怕桃源誤入。枉費着件漁簑。我睇見佢地桃花。就要回想到我。雖係冇佢花容咁靚。条命亦係咁奔波。世上箇箇都話尋花。點知道花咁苦楚。勸你地惜花人客。咪箇亂把花鋤。唉。睇到破。天台仍舊路阻。千日都因為劉郎去後。就累到佢桃花帶雨。終日咁淚滂沱。 泡過豆腐 泡過豆腐。講乜世界繁華。你睇過眼煙雲。幾咁冇渣。大抵豆腐重算有渣。話佢泡晒亦假。煙雲過眼。正似得世界離啦。講到豆腐成磚。見水就化。睇嚟世界事。邊樣正叫得做有揸拿 。做到花花世界。都係憑空話。花開仍舊會謝。枉佢燦爛過紅霞。我自係出世做人。花債就從箇日欠下。還極唔通。你話花有幾多債過我賒。世上紅粉總有萬千。何難將佢地嚟比吓。比起箇千金小姐 。我就賤過泥沙。但係千金小姐。咪話咁容易嫁。嫁著箇貪花人仔 。都夠佢羞家。到不若我地流落花叢。唔跟佬就罷。梳頭度日。亦有椀淡飯清茶。箇陣我半老徐娘。就算遇著箇青衫司馬。佢船頭過路客。我點肯重再抱琵琶。唉!唔係話自高聲價。實在睇見世情咁泡。唔取落力嚟鈀。 海棠花 你春睡未醒。故此重咁低頭。倚凭在亞字危欄。粉面帶羞。人地見你萬花如海。正話初開透。高燒銀燭。照住粧樓。想必閬苑繁華。會共佢天香鬥。睇吓千紅萬紫。邊箇占得第一条籌。點估你夢入花叢。唔知到氣候。擊起催花羯鼓。重係一味唔兜。我地花間姊妹。講樣唔會落在你後。獨係輸你西施眉黛。帶住二分愁。捨得你係會替我地花愁。亦唔怪得你容貌咁醜。點解瘦成咁樣子。重著佢蜂蝶香偷。花心咁散。必定係開唔久。就算開久番嚟。香味亦漸收。呢陣濯錦江邊。唔輪到你做羣芳首。邊箇從夢中拖起。種你上百花洲。你睇簾前鸚鵡。啄盡相思豆。唉。唔關事醉酒。你睧極都唔曾够。等到擘大眼箇陣時。就怕你在水面流。 |
