|
民初粵謳，南音，龍舟 粵韻絃歌 龍舟歌 秋女士泉台訴恨 魂不散，飲恨泉台。回首當年事實可哀。我生屬姓秋，原籍浙海。瑾字係我芳名，廿歲以來。我改字璇卿，將有十載。鑑湖別號，久已傳開。我祖父出身為縣宰。父係州同六品。都係仕宦人材 。想我官宦傳家，都兩代。我生來奇性，出自娘胎。可惜婚事唔得自由，將我錯配。許字某姓為妻，結下鏡臺。自古話夫妻邊個唔恩愛。總係唔同宗旨，點攪得埋堆。見佢頑固生成，性情不改 。故此共佢離婚，獨自主裁。我平日立論驚人，多慷慨。都話我言語離奇實所不該。但䏲見世界野蠻就難以忍耐。所以東洋游學。冀望成才。自別京門游海外。吸沐文明，眼界漸開。第一望學業成功 ，逃出苦海。更望卒業歸來，教育女孩。點想有心無力先罹害。枉費從前心血，化作塵埃。自係安慶風聲，傳到我地省內。話個革黨徐君，殺戮撫台。佢話滿漢深仇，難共覆載。故此排滿為心 ，不計禍災。不料佢大事難成，身又俎醢。重要剖心來祭，個位恩撫尸骸。個陣官場心尚未悔。話馬氏與共徐陳，固係罪魁。想佢黨羽之人，應有幾輩。不若盡數誅拏，免佢遁回。重話佢原藉浙江 ，聯結黨會。講到株連大眾，淚更盈腮。䏲見形迹可疑，刑就不貸。好似晴年霹靂，發下霆雷。佢手段擺開來對待。草菅人命豈不寃哉。重有多少學堂 ，遭佢破碎。講乜改良教育，後進栽培。估話佢罪成一身，唔好至再。點料佢捕風拏影，亂咁敲摧。呢陣鶴唳風聲，人又亂潰。更有查抄戚友，沒盡家財。大抵世界昏沉，天亦曖昧。殺人如草 ，有乜矜哀。總係佢專制官威，無乜可奈。真可慨。點點心頭在，虧我弱質無辜，葬夜臺。 心又想，更含悲。問天何事生我呢個薄命蛾眉。我自少生成狂達氣。歌成寶劍，遠近皆知。只望女界光明，終會得志。因此提倡女學，力盡心疲。可恨个的野蠻官與吏 。稍涉文明，就中了禍機。我就係性命犧牲，唔惜一死。只恨願望難償 ，禍早到期。話我與徐氏鍚麟，同志氣。東游日本，尚且同歸。况且此處學堂，係徐氏發起。就話我共渠同黨，罪要凌遲。立刻差人拘我去，估話事關人命，總要三思。况佢為民父母居官吏。倘若天良未泯，亦有半點仁慈。佢四品黃堂知府事。草菅人命，總當兒嬉。記得佢開堂問我名和字，我寫下秋風秋雨悶煞人時。佢話我係徐黨之人，謀殺大吏。絕無証據，要我命喪陰司。佢當殺人一命都閒事。故此立行批决，絕不遲疑。及見未有真供，難服眾庶。就話我另行一案，總屬為非。怪得話兩口方成，官一個字。佢雌簧信口，實在離奇。佢估話殺人能染頂子。點想撤任查叅，眾論所訾。你估大吏查叅因乜所事。話佢絕無機械，逼我供詞。我呢陣恨飲黃泉難得轉世。有邊個為吾索命，打到官司。試想恩撫被戕，徐氏就死。可惜女流一命，雪恨無期。縱使流血舍生，唔在介意。總係學生何罪，統被槍誅。早知道死屬無辜，就從早立志。不若死求轟烈，作個女界鬚眉。個陣成名烈女傳青史。勝過不明不白，命喪如斯。未必我命蹇生成應要如此。故此一到衙門，就係死期。今晚寃氣滿城無潔地。愁雲慘雨漫天飛。我轉步奈河橋上去，但見當年同學，都落在枉死城池。自古道紅顏弱質難為厲，生殺由人任佢所欺。都係我生不幸株連你。唉，真嘔氣。同埋寃枉地。待等來生共去做過個俠烈男兒。
|
||||||||||||||||||||||||||||||||
