愛書堂

莫嫌舊學偏新學

心遠廬

不薄今人愛古人

主頁

 

民初粵謳  南音  龍舟

頁:   1..   2..   3..   4..   5..  6..  7..  8..  9.. 10..  11..  12..  13..  14..  15..  16..  17..  18..  19..  20..  21..  22..  23..  24..

    廖恩燾粵謳解心   粵韻絃歌   藝海光華   星影浮沉   好歌百回聽     歌影東瀛     歌壇憶舊   經典名曲120   經典歐美流行曲    經典歐美電影 一覧


民初粵謳,南音,龍舟      粵韻絃歌         

龍舟歌   賀新年

歌一曲,賀吓新年。且向我同胞,恭喜句先。呢曲歌詞雖係淺,但得諸君聽過,各記在心田。你睇新年氣象,真堪羨,春光明媚艶陽天。有拜客好多,來謁見 ,講吓吉祥言語,各自周旋。個個把件新色衣裳,穿在外便,當行出色,委實光鮮。(平)有的三名夫轎,隨街轉,後有長隨,幾咁 闊然。手持一紙紅名片,走得汗如珠落,好似馬不停鞭。有的步行初覿面,開言恭賀,當作係口頭禪。重有的門前入到,纔相見,鞠起條腰,一味打千。坐落案前,就講到名利個件,話今年境象 ,是必勝過明年。奉客茶煙經早整便,又揭開攢盒,個個係咁手拈拈。睇見成班,細佬哥出現,料得佢分明,係想兜利是錢。即刻向住荷包,吟(借用)起個件,雙手接來,真係歡喜到癲 。得錢買食,的確諧心願,偷自解開睇吓,不敢遲延。估話有六個雙毫,真正合算,點想數(上聲)埋唔夠一仙。呢的俗例相沿,從古不變,唉!唔能免,講到個的拜年堂客 ,更重流連。

好多女客,快活逍遙。逢人看見就魂銷。穿起個件衣裳,隨處咁繞,話新年拜賀,怕乜路遠迢迢。有陣回頭笑一笑,引得遊春人客,係咁眼刁刁。裝整容顏,真正肖,兩傍花朶,襯住鳳髻高翹 。有的煎定年糕來送了,一担行盒把肩挑。重有浪蝶遊蜂,狂得緊要,唉!真可笑,習俗多煩擾,不若把將來進步,譜入歌謠。

第一賀,賀學界文明。都城鄉曲,學校齊興。試睇泰西諸國人才盛,故此國民進化,超絕寰瀛。可惜我堂堂萬里中華境,人民雖眾,學問唔精。好似大夢沈沈,還重未醒,又好似前途暗黑 ,冇一點光明。但得學堂遍設求爭勝,各圖自立,亦理所當應。咪話西國英賢,難與並,唉!須自醒,日新兼月盛,試睇主人翁個陣,指日功成。

第二賀,又賀商場,但得支那商務,日益繁昌。可歎我中國近來,貧嘅景象,民窮財盡,更重價物高昂。外溢嘅利源唔駛講,講到商權,更足慘傷。想起海外華僑 ,個哋慘狀,被人酷待,重賤過牛羊。年復一年,都係一樣,點得熱心熱力,把佢提倡。着着爭先,唔肯退讓,定必權力爭回,漸進富强。個陣富豪直駕 ,環球上,唉!真合想,商業如潮漲,免使店戶時時倒閉,係咁驚揚。

第三賀,賀機器精奇,改良工藝,共闢新機。如今手技,不過麻麻(借用)地,更新除舊 ,咪學前時。大抵家國貧窮,由百藝廢弛,試想洋貨銷流,點塞漏巵。幸得同心兼合意,出奇制勝,不用思疑。蒸蒸日上凌歐美,免使貧民日日,抵饑捱飢。我勸一句同胞,唔好自棄,總要聯埋團體,盡力而為。重有希望好多,還想向大眾道喜,不過聊將個幾件,賀吓新禧。個的歌言雖俚心須記,唉!齊奮起,前途多吉利,切莫為畏難兩個字,負卻心期。



 

 

本站旨在弘揚和傳承源遠流長之中國文化,網頁內容或有轉鈔各名家著論。如有謬誤及冒犯著作權益,請即指正 ,自當修改刪除。